政情：許曉暉似社企代言人
中秋節送月餅幾乎係指定動作，民政事務局副局長許曉暉（Florence）今年都有送月餅，但就鎖定社會企業嘅產品，今年佢支持社聯「好好社企」出品嘅「花好月圓月餅」禮盒，繼續言傳身教支持社企發展。
「花好月圓月餅」禮盒由精神病康復者及殘障人士製作，入面有四件「低糖雙黃白蓮蓉月餅」，每件都以傳統倒模工藝壓印手工字體「好」字，寓意花好月圓。禮盒嘅設計亦瑰麗搶眼，直身禮盒嘅外層係傳統手撕紙藝中秋圖案，認真好意頭。
事實上，今次已非Florence首次用社企產品來送禮，還記得今年農曆新年時，佢就揀咗東華三院社企iBakery愛烘焙麵包工房出品嘅「大福曲奇罐」做賀年禮物，唔講仲以為佢係社企嘅代言人呀！