政情：建制派做立會人肉屏障
新一屆立法會下月開鑼，會議廳座位分配經過一輪爭奪及抽籤後，尋日已大致敲定，建制派議員繼續坐喺官員席附近嘅區域繼續保駕護航，而泛民主派就繼續被編去會議廳嘅另一邊坐。據了解，建制派嘅座位分布喺其中一條主要通道兩邊嘅區域，用意係築起一道人肉屏障，隔開晒啲泛民議員，特別係防止及阻截激進派議員向官員掟嘢。
按新座位安排，人民力量同社民連四位成員繼續毫無懸念地被隔離喺會議廳最後，但左手邊就坐咗幾個建制派議員。建築、測量及都市規劃界謝偉銓同體育、演藝、文化及出版界馬逢國，會分別以一前一後方式坐喺人民力量議員隔籬。民協馮檢基同衞生服務界李國麟就要無奈坐喺拉布四人組嘅前面。馮檢基話，雖然坐喺前面有少少危險，但鬼叫自己係一人黨冇得優先揀位咩！
張超雄等葉建源成全
至於內務委員會座位表亦出爐，火花位係拉布四人組坐正喺新民黨主席葉劉淑儀、副主席田北辰及謝偉俊（Paul）後面。另外工黨張超雄投訴被秘書處逼佢搬去十樓同人民力量做鄰居，將想要嘅房讓畀教協葉建源。張超雄話，冇得同工黨同一層好唔方便，所以尋日已經同秘書處交涉，依家要睇吓葉建源肯唔肯成人之美喇。