中環出更：林曉盈推動逢周一食素
香港流行快餐文化，導致唔少港人變「食肉獸」，於是素食行動由此而生。社會企業「Green Monday」自兩年前成立以來，一直提倡逢周一素食嘅理念，廣受名人支持，原來明天更好基金理事委員、昌利行董事林曉盈（Juliana）都係佢哋嘅大使之一。Juliana話，餐餐都要食肉嘅想法已經落後，要食得有營又環保，每周一素食係最佳選擇，難怪佢身材同皮膚都保持得咁好喇。
Juliana靚女嬌滴滴，但要肩負經營家族手襪生意重任，佢話早前公司旗下內地一間工廠因電線短路而失火，一夜間化為灰燼，損失慘重。不過，佢冇因此而氣餒，反而將悲劇化為動力，同員工齊心協力，發動其餘十七間工廠連夜趕工，最終將貨品如數交到客戶手上，雖然遲咗交貨，但反而博得客戶掌聲。
研發智能手機手襪
除咗以客為先，Juliana仲與時俱進，近日研發咗一種以導電物料製造嘅手襪，用家可以戴住手襪使用智能手機，仲防埋靜電，十分貼心，有關研發已取得專利。相信今個冬季，手襪界將會掀起一場革命。
卓妮