中環出更：曾耀祥陳李妮營商有道
銀紙薄、租金貴，加埋地緣政治火藥味愈來愈濃，商界莫不慨嘆生意難做，博愛醫院董事局副主席曾耀祥（Thomas）、陳李妮（Lily）及總理袁振寧各有妙計。做米奇老鼠童裝港澳總代理嘅Thomas，睇好政府允許工廈活化做住宅嘅前景，最近密密收購工廈，笑稱自己起步遲咗，但係跟住政策走包保無錯。Lily就密謀做「手袋女王」，事關佢搞緊名牌手袋網上生意，由於慳番店舖租金等昂貴成本，所以價錢將平到令城中姐妹瘋狂。
由博愛醫院及世界針灸聯合會合辦嘅針灸專科中心，快將於下月喺銅鑼灣投入服務，博愛主席潘德明、副主席兼「美孚舖王」譚姜美珠、彭少衍及曾裕總理等人尋日齊去一睹為快，仲有潘德明嘅妹妹潘美蘭及囝囝潘治忠兩位總理。
袁振寧拓韓國新景點
久未露面嘅縱橫遊第二代袁振寧呻話，最近保釣問題令中日關係劍拔弩張，民間反日情緒高漲，令生意滑落六、七成，雖然唔夠去年嘅地震及海嘯嚴重，但係前景更加唔明朗，就算減價催谷都冇用。佢嘅應對方法係開拓韓國新旅遊景點，例如港人較少去嘅內藏山、八公山等，當地嘅紅葉美景一樣咁靚，希望可以取代日本市場。
最近美國實施第三輪量化寬鬆政策，資金氾濫勢必推高樓價，投資地產似乎係最穩陣嘅選擇。Thomas都話，以前香港廠商北移導致工廈過剩，但港府陸續開放工廈活化為寫字樓、酒店及住宅後，現時工廈業主已開始惜售，價錢亦水漲船高。尋日佢啱啱拍板買入荃灣工廈，呎價約一千三百元，雖然已經貴過之前，但佢睇好可以升到二千元以上。
卓妮