嗶嗶嗶！嗶嗶嗶！嗶嗶嗶！警鐘響起，請即戒備！
乜嘢警鐘響起呢？又係因乜事幹響起警鐘嘅呢？即係咁，有一件表面上好似微不足道嘅小事情，間接反映香港醫療系統一個大問題，所以警鐘就嗶嗶嗶響起嘞。
小事情係咁嘅，有一位行動不便嘅老病人，得到醫院安排非緊急救護車接送出院，點不知一等就等足八粒鐘先至能夠上車，老病人嘅家屬多次查詢都不得要領，不滿院方有虐老之嫌。關注團體就話嘞，事件再次敲響香港醫療服務供不應求嘅警鐘，要求醫管局盡快改善，又建議院方加強同病人及家屬溝通。
喂，癡癡地等八粒鐘喎，梗係等到佛都有火啦。你試下去巴士站等八粒鐘吖，你又試下去港鐵站等八粒鐘吖，等下等下或者極度煩躁嘅你會做出非比尋常嘅激動行為添呀。記唔記得赤鱲角機場前一排有人鼓譟呀？咪就係航班受到颱風影響而延誤囉，等得不耐煩嘅乘客怒摑櫃位小姐。
救護車無論係接載非緊急定係好緊急嘅病人，八粒鐘上唔到車都係不可接受嘅。所以話啫，醫療服務供不應求嘅警鐘真係再次響起o架，如果醫管局繼續死蛇爛鱔唔諗辦法改善，分分鐘害到病人雞毛鴨血o架。
講到救護車，不得不提消防處，因為呢一個政府部門係負責提供白車接載服務嘅。如果大家不善忘，應該記得消防處有一個老毛病，就係白車經常死火跪低，老毛病醫好咗未呢？咁講啦，功夫茶唔想見到有病人因為救治延誤而枉死囉。
除咗白車跪低之外，消防處亦係烏龍百出，採購裝備經常入錯貨，買油壓升降台竟然爆喉，買新款救護車居然冇考慮實際路面情況，新車比舊車高出三十厘米，闊度又多咗十厘米，無法通過部分救護站嘅通道。請問消防處處長陳楚鑫，入錯貨嘅壞習慣有冇戒甩呀？
講到呢度，大家可能有少少混淆，到底非緊急救護車係邊個負責o架？係消防處定係醫管局？等功夫茶講清楚啦，一般嘅救護車係消防處負責，非緊急救護車就係醫管局負責。申訴專員公署曾經批評過，醫管局嘅非緊急救護車服務等車時間過長。醫管局前一排終於答應撥款二千八百萬元增購二十架非緊急救護車，目標將病人出院等車由現時九十分鐘縮短至六十分鐘，病人轉院由等候九十分鐘減至七十五分鐘。好衰唔衰，今次有人等足八粒鐘呀，撞鬼！
總而言之，見微知著，一粒沙足以洞悉世界，既然醫療服務供不應求，如果醫管局唔加人加車改善服務，功夫茶懇請申訴專員再狠狠地伸佢一腳！