前天文台台長林超英（黑英）雖然一早離開官場，但佢仍然熱心參與公益事務，仲不時喺網誌同外界分享所見所聞。黑英話自己喺八月中搭破冰船去北冰洋，但途中竟然連一片細碎嘅浮冰都睇唔到，估計今年夏季海冰層因全球暖化而退到比以前更北嘅地方，慨嘆同北冰洋海冰始終緣慳一面。黑英憶述，佢哋喺出發去北冰洋前先喺附近嘅斯瓦巴爾德群島（Svalbard）留咗一段時間，之後就登船航行到北冰洋。黑英話斯瓦巴爾德群島位處北極圈，夏季廿四小時都有陽光，日夜溫差唔算太明顯，所以食飯、瞓覺要「睇鐘做人」。
佢又話，雖然有科學家估計北冰洋夏季海冰將會喺二○五○年前完全消失，但照佢觀察，海冰減少嘅速度比計算結果仲要快，慨嘆將來用普通輪船橫渡北冰洋將唔再係夢想。