政情：吳文遠：社民連救亡
喺兩星期前嘅立法會選舉入面，差唔多每區都有派人出選嘅社民連淨係得主席梁國雄（長毛）以大熱的姿態，成功連任，其餘三區都全軍敗北。當中副主席吳文遠以新星身份首次出戰港島都只係攞到三千幾票，成績認真麻麻。吳文遠分析敗選原因時話自己係輸畀選民嘅「棄保效應」，佢話唔少港島區選民雖然支持佢參選，但由於大部分人都覺得佢無機會贏，於是改投其他更有勝算嘅候選人。吳文遠又悲觀咁話如果情況持續，社民連最後只會淪為一人黨，對社民連長遠發展不利。
吳文遠透露，好多人曾經建議社民連好似公民黨咁，叫長毛排第二力谷新人上位，但長毛同其他執委都覺得新人要靠自己打響名堂，所以最後都無接納呢個建議。佢又話黨內現正思考社民連未來路向，包括參考其他政黨咁用新興媒體向外推銷社民連各新人，喺未來四年盡力谷高知名度，希望到時選民口話支持社民連，最後投票都係投番畀佢哋喎。