政情：長江設獎學金鼓勵港澳交流
為鼓勵香港及澳洲學生交流，長江集團早前推出「長江澳洲毅進獎學金計劃」，今年得獎學生多達四十九人，包括二十名去澳洲讀書嘅學生，同廿九名嚟香港讀書嘅澳洲學生。集團尋日喺香港舉行頒獎禮，讓本港與澳洲嘅得獎同學聚首一堂，分享交流經驗。
長實董事總經理兼副主席李澤鉅親自出席恭賀得獎人，澳洲維多利亞州州長Ted Baillieu專程來港出席活動，以示重視。李澤鉅致詞時話，深明國際視野對下一代好重要，所以透過呢個獎學金計劃，為同學們擴闊視野，讓佢哋喺全球化下好好裝備自己，成為未來領袖。該計劃自推出以來一直廣受歡迎。過去八年共有超過一千六百名大學本科生及研究生、四十家澳洲大學，以及約一百八十家亞洲大學參與。
「長江澳洲毅進獎學金計劃」由長江集團及澳洲政府喺○四年成立，係一項為期十五年嘅獎學金計劃。雙方合共出資約港幣一億八千萬元，資助約三千五百至四千名學生交流。
長江集團係澳洲最大嘅單一海外投資者，喺當地嘅投資額超過港幣八百億元，僱員人數約九千二百人，業務包括配電、輸電、配氣、食水供應、電訊、港口、醫藥同保健產品，同埋葡萄園與農業有關嘅業務。