政情：重劃選區趕絕細黨

現時立法會選舉採用比例代表制加最大餘額法，只要拎到百分之六至七選票就可當選嘅議員比比皆是，其中以人口密集新界東、西嘅情況最為明顯。今次新界東、西選舉中，除咗公民黨喺開行吸票機下吸到一成四選票，同埋社民連梁國雄取得一成多得票率外，其餘當選議員只係取得百分之六至八選票就可以成功當選，當中新民主同盟范國威只係得百分之六點二嘅得票率，就可以成功取得末席當選。

新西人多 或增北區

眼見現行選舉制度有利細政黨入局，於是有建制派人士密謀重新設計整個選舉制度，最直接嘅方法係取消比例代表制或者最大餘額法，以杜絕一啲代表少數聲音入局。不過，呢項始終係「大手術」，要取得共識並唔係咁易，於是又有人提出折衷方法，就係將選區劃得細啲，令激進派嘅少數支持者難以聚集選票，變相趕絕細政黨。

雖然呢個劃細選區講法明顯有其政治考慮，不過呢個「陰謀」又有啲理據，因為目前嘅選區的確太大。以人口最密集嘅新界西為例，新西目前有二百多萬人，按人口比例應可獲配十個議席，但由於《立法會條例》規定，地區直選嘅議員人數不得少於五名及不得多於九名，所以去年增加議席時都係只獲增配一席，令新西目前每個議席代表廿二萬人，遠高於每席代表選民數目上限。如果多劃出一個北區，可能就啱數嘞。

唔大唔細 隨時捉蟲

事實上，有泛民政黨亦同意劃細選區有助選舉工程，之不過，究竟要點劃同劃到幾細先合理呢？有泛民中人就話，最怕到時選區唔大唔細，半桶水對邊個都無利，又話如果建制派單由政治機心出發，諗住劃細選區就可以篩走代表少數嘅聲音，居心叵測但又有可能隨時捉蟲，事關今屆立法會選舉建制派中，僅以百分之六咁上下當選嘅候選人亦大有人在。其實單靠劃區又點會排擠到激進聲音吖，就算佢哋入唔到議會，自然有其他地方發聲。