中環出更：美女食療家靠拉筋修身
拉筋唔單止係熱身，仲可以修身。有四分之一葡萄牙血統嘅美女食療專家、O Green Cafe創辦人Vivi Cheung，自二十多年前接觸拉筋運動，發現燒脂一流，更改善血液循環，至今堅持鍛煉。佢話初初拉筋痛到標眼水，慢慢學懂放鬆，依家一個動作維持十分鐘，仲易過食生菜。
做飲食業嘅Vivi係為食妹，經常周圍試食搵靈感。日前Vivi就去咗上環嘅樓上店「twyst」，同主廚Ken傾吓食經。食物與健康息息相關，崇尚天然嘅Vivi喺澳洲讀食物醫學出身，擅長以食物改善人嘅體質。佢堅持唔食西藥，一有頭暈身o架，即刻食洋葱、黑蒜、蜂蜜增強抵抗力。
當日Vivi柯打幾道菜，均美味與營養並重。煙三文魚牛油果雪卡條，蘊含不飽和脂肪與維他命E，虎蝦蟶子燴薯仔麵團，口感煙韌又低脂。安格斯肉眼扒啱晒缺少鐵質嘅女士，甜品「飄浮雪山」口感輕盈，係Vivi至愛。伊人至今單身，不過佢話唔着緊一紙婚書，搵到心靈伴侶至為重要。