中環出更：與四子女馬場享天倫歐雪明樂助資優兒
馬場唔單止係賽馬活動愛好者嘅常到之處，唔少名人都鍾意帶埋仔女入嚟湊熱鬧。尋日沙田馬場化身兒童樂園，仁愛堂副主席歐雪明（Clarea）就帶埋四位公子與千金、媽媽、家姐一家入場享受天倫樂，二女Natasha特別興奮，皆因佢好鍾意親近馬匹，仲學咗騎馬兩年幾添！
Clarea話，老公東華三院總理李鋈麟出咗門，所以湊仔嘅責任就交畀佢。依家好少家庭生四個咁多，Clarea笑謂自己好鍾意小朋友，唯一苦惱嘅係有時四個仔女一齊講嘢，佢都唔知回應邊個好喎！Clarea年前贊助仁愛堂開設兒童資優發展中心，原來佢四子女全屬資優，事實上唔少兒童都係資優生，只係家長們埋首工作，忽略對子女嘅培育，冇好好發揮佢哋嘅天賦，所以希望開呢間中心，幫助資優兒童盡展所長。
葉振南一家展現和諧
享受家庭樂嘅仲有啤酒代理商葉振南（Stephen），尋日佢一家五口齊現身，力捧佢同妹妹葉嘉齡隻愛駒「靚酒王」。近日iPhone 5熱賣，Stephen竟然不為所動，話自己只用三星手機。身邊嘅大仔Albert就笑言，其實除咗爸爸之外，佢哋全家都幫襯iPhone喎，難得大家用唔同手機一樣咁和諧，體現潮州人嘅美德。講到近日樓市創新高，Stephen就話，如果有實力嘅就唔怕入市兼放長線，否則就要忍忍手喇。
「造紙大王」李運強公子李文恩（Norman）同母親及太太郭靜怡都喺度，Norman透露最近忙喺江西發展化工基建，喺江蘇、重慶都有設廠，佢話依家唔少港商都遷到長三角發展，由於接近長江，交通便利，大把商機喎。
卓妮