蠱惑酒家明劏食客
咕嚕肉索價二百七十八元，食客慘變「水魚」！有市民在尖沙咀一間酒家晚膳後出現收費爭拗，所點例牌菜式加大分量後竟被多收兩倍。飲食業界直指酒家做法有欠妥善；消費者委員會則提醒市民，決定光顧食肆或點菜前須清楚收費情況，以保障自身利益。
「價錢任佢噏，真係好過去搶！」盧小姐一行十三人日前到於尖沙咀一間酒家為友人慶祝生日，訂枱時接受酒家建議使用獨立廳房，亦清晰最低消費為三千元。不過，當晚除已預訂的聖子、鮑魚及燉湯價錢早已知悉外，其他散點小菜竟在不知情下被當作酒席價錢計算，總收費逾四千六百元。
酒家經理強調不涉欺瞞
盧再三要求下，酒家才肯分開標示小菜價錢，但發現每道菜的收費竟較酒家傳真菜單所列錢價高出兩倍，例如菜單列明八十八元的芥蘭煲被索價二百四十八元、例牌七十八元的咕嚕肉收費二百七十八元，「但係啲分量最多得兩碟，叫兩個例牌分分鐘仲多啲，有乜理由收咁貴！」面對食客投訴，涉事酒家經理蕭先生仍強調收費合理且不涉欺瞞，又指廳房不接受散點小菜，所有菜式需以酒席價錢計算，事先已告知客人，「開間房畀你，有部十五匹冷氣，又燈又有專人服侍，個價錢點可能同散座比，消費唔起可以唔開廳房！」蕭指廳房酒席價錢不包茶芥酸菜、白飯汽水及加一，但對廳房小菜價錢如何釐定則未有正面回應，只稱有關價錢乃「十三個人嘅收費」。
須向顧客說明收費規則
「個客叫嘅嘢已經符合咗最低消費要求，有冇專人服侍呢啲嘢根本唔關事，唔可以因為咁就要收貴啲！」香港餐飲聯業協會會長黃家和認為，倘顧客消費已滿足最低消費要求，酒家再無理據拒絕客人散點小菜。黃又指一般例牌菜式可供四至六人享用，但並無列明分量增加多少、如何計算價錢的「加大」則說法含糊，認為酒家在溝通上需負上較大責任，須向顧客清楚講明規則及收費，避免事後爭拗。
消委會去年接獲涉及食肆收費爭拗的投訴共一百三十宗，今年一月至八月則接獲一百零四宗投訴。該會發言人稱，消費者在點餐前應先查詢每道餸菜價錢才確認點餐，避免出現爭拗。「好似例牌菜分量要加大，甚至餐牌冇嘅餸菜，都要先問清楚價錢，落單嗰陣，仲要用手指指明餐牌上面要叫嘅嘢食同價錢，唔使畀機會問題食肆獅子開大口！」發言人又提醒消費者，食肆或有不同餐牌及優惠時段，點餐前亦須加倍留意。