開講有話，天下沒有免費午餐，凡係免費嘅嘢，通常都唔係好嘢。好似派通街驚死冇人要嘅淫賤《爽報》等免費報紙咁吖，濫印濫派，唔止阻街擾民，而且製造垃圾，破壞環保，禍患無窮，簡直係社會公害。
好多打工仔及學生每日最痛苦嘅經歷，唔係工作及功課壓力大，而係免費報派發造成嘅滋擾，人流愈多嘅地方「塞人」愈嚴重，情況愈混亂。呢，好似大埔港鐵站外面一條行人隧道咁，乘客必經之路竟然淪為「免費報專用區」，包括《爽報》在內嘅多份免費報都擠晒喺入面派，搞到繁忙時間隧道例牌「大塞人」，除咗影響市民返工返學，一個唔好彩隨時釀成人疊人甚至人踩人嘅悲劇，你話唔驚就假。
除咗大埔，其他地區亦唔好得去邊。本報記者巡查過多處免費報派發地點，發現問題多多，愈睇愈驚。最牙煙嘅係，唔少港鐵站出口、行人通道以及商場門口都被免費報「盤據」，連走火通道都阻塞埋，萬一發生火警或者其他意外，後果真係不堪設想。仲有吖，好多老人家周圍去攞免費報，唔係攞嚟睇，而係當廢紙賣，結果堆到上屋企天花板，好似計時炸彈咁，如果有乜意外，隨時燒通頂甚至連累埋隔籬鄰舍都似。
所以話，免費嘅嘢真係冇好嘢。香港彈丸之地，竟然有六、七份免費報，每日合共派發三百萬份，而且據講仲有機構準備加入戰團添，唔止係七國咁亂，直頭係地球浩劫。大家咪以為呢個世界真係有免費午餐，免費報粗製濫造，內容空泛，尤其係《爽報》仲誨淫誨盜添，得益嘅唔係讀者，亦唔係廣告商，而係廢紙回收商咋。今時今日廢紙有價，唔少免費報派發後即刻落入「回收兵團」手中，當廢紙變賣，有啲免費報甚至派都未派就畀人一疊疊運去回收場，真係該煨。
有環保團體計過數，以本港每日印刷三百萬份免費報計，一日用紙四百四十噸，一噸紙需要十七棵樹，一周五日就要砍伐三萬七千棵樹，相等於三個半維多利亞公園面積嘅樹林，問你怕未。免費報話就話唔使錢，弊在阻街擾民、浪費資源、破壞環保甚至構成安全隱患，呢啲社會成本根本無法計算。
講開又講，近排水貨客逼爆北區引起爭議，當局順應民意，採取措施撥亂反正，經過多個部門犁庭掃穴之後，水貨活動即時有所收斂。其實，免費報帶來嘅亂象及問題比水貨活動有過之而無不及，唔知當局幾時先至肯正視，幾時先至肯出手整頓，幾時先至可以令香港「光復」呢？