我哋尋日喺一個酒會上見到身兼全國政協委員嘅中華總商會會長蔡冠深，當然問吓佢有冇諗住「升呢」做政協常委啦，但佢話呢啲係國家事務，應由國家決定喎。
不過，經我哋再三追問下，蔡冠深就話：「唔留班就好，自己識做嘢就好！」似乎內有玄機喎，莫非佢想暗示自己會升班做政協常委？出席同一場合嘅港區全國人大代表劉健儀（Miriam），被問到會否角逐連任人大代表，佢就話要諗吓先再決定。
雖然Miriam剛落選立法會又辭去自由黨主席之位，但面對該黨仍未有人接棒，Miriam就話唔係太急，因為依家有批發及零售界議員方剛暫代主席，但佢就斬釘截鐵話，無論如何都唔會做返主席喎。