政情：葉劉怕尷尬 唔做「保安」揸弗人
新一屆立法會即將展開，各個事務委員會成員亦開始大執位，想競逐委員會正副主席嘅人選都陸續浮上水面。之前一直盛傳建制派想新民黨主席葉劉淑儀擔任保安事務委員會主席，用以監察及制衡會內嘅泛民主派涂謹申，但葉劉尋日出席活動時坦言，因為有太多同保安相關嘅官員都係佢嘅舊同事，擔心做起嘢上嚟會尷尬，所以都係想競逐公務員及資助機構員工事務委員會主席。
不過，如果葉劉真係要競逐公務員事務委員會主席，就要先過工聯會同工黨嗰關，所以葉劉話最後決定要等下星期建制派開完會先知道。對於有傳葉劉會加入行政會議，佢就強調要同特首梁振英傾吓，了解依家行會成員需要扮演咩角色先至決定。至於會否擔心加入行會後會同議員嘅角色有衝突，葉劉強調，自己絕對唔係退縮嘅人，亦唔會避子彈，只希望可以提供意見畀政府，協助政府施政喎。