政情：立會新丁似小學雞

尋日各位新丁議員先喺會議前廳集合，唔知係慢熱定係大家唔係太熟嘅關係，泛民主派同建制派新丁初次見面甫入前廳已經「劃地盤」，兩方非常有默契地按地氈顏色企位，散落於前廳不同位置，泛民新丁攻佔前廳紅地氈區域，建制派就採取包圍策略，盤據「紅區」以外範圍，驚死踩過界咁。

「舊人」張超雄中途閃人

難得進身「尊貴議員」，班新丁行程之一梗係要去會議廳內坐吓議員座椅過吓癮啦！正當大家翹首以待，民建聯蔣麗芸（Ann姐）就好緊張會議廳內射燈會照到佢塊面黃晒，要秘書處職員解釋一番。其他議員就提出好多建議，例如資訊科技界莫乃光建議立法會紀念品應由大學設計，可以畀學生多個實習機會；至於紡織及製衣界鍾國斌仲忽發奇想建議立法會內加建泳池添！

蔣麗芸希望立法會嘅紀念品有女士用嘅絲巾。	中總廖長江（中）、民建聯陳恒鑌（左）及何俊賢（右）擔天望地睇立法會嘅裝修。	一班議員入到兒童學習室表現好興奮，但吳亮星同廖長江就企喺後面翹埋手。（張家灝攝）

至於重返議會嘅金融界「星爺」吳亮星，就話自己係「溫故知新」，全程企後排「食花生」睇戲，同班新丁新奇有趣嘅表情相映成趣，搞到候任秘書長陳維安都主動上前搭訕，但星爺就話：「我冇咩意見，但如果你問起我就有啲嘢講。」之後同陳維安行埋一邊密斟。另一重返議會嘅張超雄更中途閃人，真係悶到頂唔順。

何俊賢興奮頭都未梳

雖然Ann姐好緊張塊面黃唔黃，但並唔係個個民建聯黨員都咁貪靚嘅。話覺得自己變咗小學生去旅行咁興奮嘅漁農界何俊賢，連頭都未梳好就現身，髮尾翹起晒似動漫「龍珠」嘅角色咁，可能係時下最潮髮型之一。反而工聯會三位新丁郭偉強、鄧家彪同麥美娟唔見影，唔通工聯會背後有專人教路？