中環出更：楊釗儲人仔 抗銀紙貶值
美國第三輪量化寬鬆措施（QE3）出台，變相無限期印銀紙，推高本港樓市及通脹。不過，你有張良計，我有過牆梯，「牛仔褲大王」旭日集團董事長楊釗及中華廠商聯合會會長施榮懷（Irons）就努力儲「人仔」人民幣，唔怕銀紙貶值喎。
楊釗預測中長期嘅地產、股票同通脹都會上升，佢話如果有錢喺身而唔想貶值的話，可以放喺高息嘅債券，亦會買人仔，事關依家人仔做緊三厘息，穩穩陣陣好過啦，係咪？至於香港啲樓點解咁貴，楊釗就覺得同供求有好大關係，但佢本身都擁有物業收租，所以唔急於再入市喎。
施榮懷為QE3叫苦
Irons就覺得QE3分分鐘係個隨時會爆嘅大泡沫，佢話依家好多廠家都叫苦連天，事關成本不斷上升，對製造業好不利，就算有人提議將廠房搬去東南亞，始終人生路不熟都唔係好方法，所以好多廠家都惟有揀訂單嚟接，做少啲蝕少啲。Irons同楊釗一樣，內地有好多生意，通常用人仔結算，而人仔亦係佢持有最多嘅貨幣，所以美元貶值對佢影響不大。