飛哥跌落坑渠，飛女睇見流淚，似醬鴨臭腥攻鼻，飛女夾硬扶住佢。假如情節改一改，貪曾跌落坑渠，你估有冇人會流淚吖嗱？開講都有話啦，人一走，茶就涼，為過氣特首曾蔭權落難而流淚嘅應該絕無僅有囉。
有一個古仔好鬼死搞笑，非常貼切咁概括咗貪曾嘅興衰史，正所謂咯喎，有咁耐風流，有咁耐折墮。即係咁，灣仔區議會十幾年前大搞綠化計劃，區內廣泛種植樹木，搵咗唔少高官猛人擔任植樹大使。最近環保組織長春社發現，位於摩利臣山道同黃泥涌峽行車天橋底行人路有一棵大樹，長期缺乏照顧不特止，樹上一塊不銹鋼製造嘅名牌更加跌咗落地，已經同地底泥黐黐纏纏。呢一塊折而墮之嘅爛鬼名牌，上面鑄咗兩行字，第一行係「灣仔區綠化計劃第888棵樹」，第二行係「由財政司司長曾蔭權太平紳士於二○○○年十月二十八日親臨種植」。
呢個古仔好笑得嚟又非常可悲。首先，貪曾跌落污泥，堂堂一個爵士因樹之名折墮成咁，即係名譽掃地啦，係咪貽笑大方呢？雖然，落紅不是無情物，化作春泥更護花，好衰唔衰象徵貪曾嘅係一塊不銹鋼，點都冇辦法化作護花嘅春泥。
其次，可悲嘅地方就係一棵大樹種完之後冇人照顧，十足十曾蔭權始亂終棄丟低唔理嘅孤兒仔，幾慘情呀。功夫茶有少少擔心，假以時日風吹雨打蟲咬菌侵，呢棵樹砰嘭一嘢仆落街，唔知會唔會成為赤柱冧樹殺人嘅翻版。
講到大樹缺乏照顧，或者照顧得不倫不類，講真吖，呢個問題相當普遍。好似尖沙咀栢麗大道咁吖，前一排颱風吹一吹，咁就吹到兩棵細葉榕危危乎，為免禍及途人而腰斬處決，古樹名木買少見少。
發展局轄下嘅樹木管理專家小組開會討論，睇下點樣擴建栢麗大道嘅花槽，又點樣保護問題古樹。重新加入小組嘅長春社總監蘇國賢認為，政府應該先了解栢麗大道古樹狀況先至對症下藥，如果古樹根部已經腐爛，即使擴建花槽仍然有倒塌危機。蘇國賢仲話，全港目前有超過兩成古樹接近半死狀態，應該針對性選擇種植於路邊有得救嘅樹木，由專家優先討論及跟進，未來亦有需要更新古樹名冊或者引入預備古樹名冊，加強保護有代表性嘅樹木。
喂，兩成古樹接近半死狀態喎，你話係咪疏於照顧嘅結果吖？如果曾蔭權養嘅錦鯉有兩成陷入得番半條魚命嘅瀕危狀態，呢個主人都有虐待小動物之嫌啦。
點都好啦，舊政府逝者如斯乎，新政府臨危受命矣，救樹如救人，救得一棵得一棵呀，善哉善哉！