新一屆立法會下月開鑼，最近多個搵工網站都有議員助理嘅招聘廣告，但履歷要求各有不同，自然造成同工不同酬嘅情況。民建聯創黨主席曾鈺成聘請嘅議員助理，要求負責處理個案及辦事處運作，加上要熟悉策劃同舉辦活動，提供嘅待遇每月一萬至一萬一千元。亦有白鴿黨嘅雙料議員，請議員助理月薪低至九千元。
不過，要數到最為出手闊綽嘅議員，始終首推功能界別議員，其中被外間形容為富貴黨嘅議員，議員助理嘅起薪點喺每月三萬元兼保證有雙糧，當然要求要有三年經驗並且熟悉時事，自不然要有較高人工先有吸引力。新民黨都有刊登廣告請人，其中黨主席葉劉淑儀聘請社區統籌主任，黨副主席田北辰就請議員助理，佢哋不約而同叫有興趣應徵者填寫自己心目中嘅薪酬水平，莫非佢哋出到嘅薪酬差距係可以好闊嘅？