政情：同僚用本報漫畫送別吳文華
立法會秘書長吳文華（Pauline）將於月底退休，秘書處一眾職員尋日就搞咗個午餐會歡送佢，一共有百多個立法會職員出席，Pauline嘅接任人陳維安都係座上客。一眾職員好有心思咁準備咗一份非常貼心嘅驚喜畀Pauline，原來係一本輯錄咗本報政情版插畫嘅紀念冊，全部都係同Pauline有關嘅立法會新聞，所以呢份禮物話係獨一無二。
原來Pauline一直都好欣賞本報嘅政情插畫，秘書處職員於是就特登將所有同Pauline有關嘅漫畫輯製成一本紀念冊送畀佢。Pauline話，雖然漫畫嬉笑怒罵、有讚有彈，有時將佢畫作財神，有時又畫佢係燈膽，但無論漫畫係翳佢定讚佢，佢都咁鍾意喎，事關最鍾意我哋將佢條腰畫到幼一幼，望住條纖腰，咩氣都消晒啦！
Pauline話，收到漫畫後非常雀躍，即刻禮尚往來回送一人一個杯蓋，皆因立法會工作繁重，但人手不足猶如「十隻杯冚得七個蓋」，希望日後大家做到一頭煙嘅時候，都會用得着喎，莫非佢想暗示接任人陳維安要落力爭取增加秘書處人手？