泛民主派一直質疑建制派濫用票站調查幫自己配票，呼籲支持者杯葛甚至故意欺騙調查員，但港大民意研究計劃總監鍾庭耀尋日喺電台話，港大喺今次立法會選舉嘅票站調查結果顯示，向佢哋嘅調查員講假話嘅選民唔多，仲趁機賣花讚花香話港大嘅票站調查有幾準確。但當晚佢預測多達十九張名單大混戰嘅新界東選區結果時，幾乎話個個候選人都係「機會均等」，做預測做得咁縮骨，結果自然唔會錯啦！
同鍾庭耀一齊出席電台節目嘅民研計劃高級數據分析師戴捷輝指出，佢哋喺投票結束後凌晨一時公布嘅票站調查結果，二十名被歸類為「機會極高」嘅候選人最後全部勝出，九名「機會較高」候選人亦有七人當選，顯示調查可信度好高。至於今次調查最為人津津樂道嘅結果，即係貼中民建聯「票王」劉江華完全冇機會當選超級議員，戴捷輝就冇攞嚟做例子，可能佢係出於厚道，費事喺劉江華傷口灑鹽。