政情：拗最低工資 泛民玩內訌
六名現任及候任泛民主派立法會議員，尋日一同出席民間爭取最低工資聯盟嘅記者會，以示團結一致，爭取將法定最低工資水平由現時嘅時薪廿八元，調高至不少於三十三元，但期間又爆出人民力量暗寸民主黨（白鴿黨）出賣基層勞工嘅風波。連咁簡單一個關乎民生議題嘅記者會都內訌，睇嚟泛民喺未來四年都係會繼續一盤散沙、一事無成。
六名議員分別為白鴿黨胡志偉、工黨張超雄、人民力量陳志全（慢必）、街工梁耀忠、民協馮檢基同新民主同盟范國威，其中白鴿黨支持最低工資不少於三十三元，其餘五個黨派就支持三十五元，但為咗顯示團結，大家一早講好會統一表述為爭取不少於三十三元。
胡志偉被寸 當堂黑臉
不過，喺立法會選舉期間多次攻擊白鴿黨嘅慢必，發言時就暗批該黨唔支持三十五元，即係冇企硬力撐基層勞工，令坐喺佢身旁嘅胡志偉當堂黑臉。事後胡志偉大呻慢必唔啱，強調該黨嘅立場係爭取最低工資不低於三十三元，冇反對他人爭取三十五元。