政情：雙陳頂上做港區人大？
近年建制派跟隨大形勢邁向年輕化，據聞今年底舉行嘅港區全國人大代表選舉亦貫徹呢個主張，至今有近十人決定不再參選。當中擁有眾多會員嘅新界社團聯會（新社聯）同九龍社團聯會（聯會）嘅人大代表好大機會退下火線，前者預料會由年僅四十三歲嘅理事長陳勇接棒，後者則傳聞會係聯會會長陳振彬（Bunny）頂上，「雙陳」倘齊齊選人大，唔知佢哋會否一齊拉票爭取支持呢？
陳勇：等新社聯決定
現屆港區人大有三十六人，據聞至少有約十人會放棄角逐連任，大部分都係因為年齡問題，亦有小部分係因連任多時希望交棒，好似做咗三屆人大代表嘅新社聯榮譽會長羅叔清，由於佢過去係代表新社聯參選，外界一般都相信新社聯如無意外會搵自己人頂上。
據悉，新社聯早前曾喺內部醞釀合適人選，綜合各方條件以陳勇呼聲最高，主因係會長梁志祥已循新界西直選進身立法會，加上佢身負元朗區議會主席重任，未必有多餘時間身兼人大職務，故此有聲音想推薦活躍於新社聯事務及富有選舉經驗嘅陳勇。陳勇接受查詢時話，現正積極考慮參選，但仍有待新社聯作最後決定。
聯會擬交棒陳振彬
除咗新社聯外，扎根喺九龍東同九龍西嘅九龍社團聯會亦有交棒計劃。有消息話，剛榮升聯會永遠會長嘅人大代表高寶齡，私下已向友人表態希望喺年底人大選舉交棒，有傳聞係交棒畀剛履新做會長嘅Bunny，因為Bunny目前既非人大亦非政協，相對嘅參選包袱比較細，加上佢做咗聯會會長，令外界聯想佢接棒人大都唔出奇。
政圈仲流傳一個講法，話陳勇同Bunny早前一度傳出有意參加立法會直選，但結果無疾而終，疑似被有關方面勸退，所以藉今次人大換屆補償埋都未定。究竟呢場人大選舉會產生幾多新面孔，相信好快就會浮上水面。