中環出更：希慎女當家 忙裏偷閒試首飾
喺銅鑼灣地產市場雄霸一方嘅希慎興業，旗下商場名店多不勝數，但希慎興業第三代女當家利蘊蓮（Irene），就鍾意周圍去閒逛。日前一個下午時間，卓妮見Irene着住件好搶眼嘅鵝黃色連身裙，出現喺名店林立嘅中環太子大廈一間珠寶店，佢一坐低，職員就拎出飾物畀佢試戴，Irene喺鏡前仔細打量，但最終都係冇買嘢，大約五分鐘後就起身走人，空手而回。
卓妮上前同Irene打招呼，佢就笑笑口話自己經常會周圍去睇吓嘢，仲話近排好忙，跟住要趕住返去做嘢，然後就搭升降機離去，真係日理萬機。Irene係利希慎三子利孝和嘅次女，現任希慎興業主席，上月佢就見證希慎廣場呢個家族地標性物業嘅落成啟用，忙到不可開交，但事業型女性，幾忙都要Shopping買衫買首飾扮靚嘅！
