中環出更：專資會六周年CY高官同慶
雲集「梁粉」嘅香港專業資深及行政人員協會（專資會），眨眼已六歲生日，前晚喺灣仔會展開香檳慶祝。擔任該會榮譽顧問嘅特首梁振英（CY），率領一眾高官到賀，包括食物及衞生局局長高永文、財經事務及庫務局局長陳家強、律政司司長袁國強、發展局局長陳茂波（Paul）及教育局局長吳克儉。五位高官之中，除吳克儉外，全是「專資人」，個會官運亨通，當然要慶功啦！
輪流吐真情
CY一手培育嘅「專資會」人才濟濟，唔少仲做埋「梁粉」添，喺出爐立法會選舉中，更有六人當選，難怪CY致詞時祝賀專資會「六六無窮，生生不息」。高官向來親民，晚宴上破天荒來一場超級版「與司‧局長有約」，五位高官輪流吐真情。吳克儉坦言，做官後出街都被市民監察，唔敢再着Tee恤，去街一定戴帽、戴黑超及打扮整齊。碌卡時更謹慎，叮囑對方唔好幫佢入分；坐飛機時，又拒儲飛行里數。難怪佢話：「上任七十八日，鑊鑊新！」
阿Paul就自爆唔敢亂咁出席朋友飯局，即使好友邀請，都會查問同枱有乜人，差點令人誤會佢擺款。佢承認做官後壓力大，每朝六點去跑馬地碼頭跑步減壓。袁國強就自嘲係悶人，埋首工作時常「面黑黑」，令同事唔敢同佢講笑，查實佢份人平易近人。但講到上任以來甚麼時間最輕鬆，袁國強就不假思索話：「係今晚！」至於高永文就發揮幽默本色，話最輕鬆係同政務司司長林鄭月娥遊船河，雖然係巡魚排視察膠粒污染情況，但樂在其中喎。
政府係熱廚房出晒名，陳家強都感同身受，佢拍心口話唔怕高溫，事關呢個係「中式廚房」，熱啲表示火候十足，鑊氣夠，炒出嚟嘅餸先會更好味。立法會拉布戰不絕，官員疲於奔命，但陳家強就唔怕，坦言為官五年，最輕鬆係上立法會，事關有晒遊戲規則，以理服人就得，總之獲益良多。
卓妮