功夫茶成日覺得，香港最凍嘅季節唔係冬天而係夏天，因為到處都好似電費唔使錢咁狂噴冷氣，去到商場好似入咗雪櫃，急凍效果足以令你縮手縮腳變咗一粒人形蝦米。之但係話分兩頭，正如新加坡開國總理李光耀話齋，降溫一流嘅冷氣機係人類史上最偉大嘅發明，否則熱到出汁嘅民眾都唔知點樣提得起勁埋頭工作，從而振興經濟有錢齊齊搵。
冇錯嘞，冷氣機係偉大嘅，只要用得其所就可以振興經濟。偏偏香港有一個世界知名嘅旅遊勝地，哈，居然長期冇冷氣喎，焗到遊客淪為熱鍋上的螞蟻，你話奇怪唔奇怪？咁奇怪嘅人間熱鍋位於油麻地，正確名稱係「油麻地玉器小販市場」，擁有接近三十年嘅悠久歷史，係香港玉器及寶石交易集中地，連權威嘅美國探索頻道Discovery Channel都有推介，每年吸引大批訪港遊客入場參觀，你都咪話唔係蜚聲國際。
本報記者冇耐之前去到玉器市場視察，發現街外氣溫係攝氏三十二度，市場之內平均溫度竟然係三十三點四度或以上，較入位置嘅攤檔更加錄得三十五點八度高溫。有檔販透露，前一排颱風天秤雖然過門不入，不過都導致場內氣溫高達四十度。喺咁熱氣沸騰嘅環境之下，莫講話遊客留不住，連檔販自己都要久不久出去透透氣，否則焗到中暑都有之。
既然玉器市場係咁翳熱悶焗，一無通風，二無抽風，三無凍風，只靠場內幾百架電風扇聊勝於無勉強降溫，係咪應該加裝冷氣呢？當然應該啦，問題係港產官僚一向奉行不做不錯政策，食環署長期漠視焗到嘔會導致遊客雞飛狗走，多年來任由玉器市場自生自滅，一直以快將搬遷為藉口，拒絕投放資源添置設施降溫，變相令到香港旅遊業賺少好多遊客錢。
油尖旺區議員陳少棠係咁講嘅，政府計劃留待中九龍幹線落成之後，喺天橋底重置玉器市場，但係呢條幹線一直未有確實興建日期，搬遷玉器市場由上屆政府講到依家都未成事。換句說話嚟講，政府拖得一時得一時，冇誠意解決問題。
如果功夫茶係特首梁振英，為咗吸引遊客盡情消費從而振興經濟，一定會落一道死命令。食環署署長梁卓文必須親自去玉器市場走一趟，而且要由朝到晚唔准離開，感受一下四十度高溫嘅可怕威力。若然梁署長冇焗暈冇中暑，返去唔該積極諗諗辦法為玉器市場加裝冷氣，閣下都唔想有遊客熱到暴斃而搞到香港臭名遠播o架，吓話？