港府尋日宣布胡定旭續任醫院管理局主席，為期一年。醫管局主席呢個咁重要嘅職位，肥胡由○四年開始做，如果再做多一年，就係一共九年，遠遠超過擔任一項公職不得超過六年嘅規定。據聞肥胡同食物及衞生局局長高永文非常合拍，而且兩個都係潮州人，所以係高醫生要求佢再坐一會。喺特首選舉，肥胡係深唐分子，梁振英當選後，肥胡好快就話自己係香港營嘅，今次嘅委任，咪好清楚講明咗呢點囉。
