政情：炳江炳聯現身派定心丸
捲入前政務司司長許仕仁涉貪案嘅新地郭氏兄弟郭炳江同郭炳聯，自從今年七月被廉署落案檢控後，一直冇公開露面，直到新地尋日舉行全年業績記者會，先見兩兄弟現身，但就唔見佢哋兩位公子，即係被委任為新地代任董事嘅郭基煇同郭顥澧出現，令人關注新地可能出現接棒問題；不過，二少郭炳江就大派定心丸，話新地一直有班老臣子撐住，唔使佢哋兩位郭氏第三代，集團業務都一樣運作如常。
官司未有影響心情
打咗條粉紅色呔嘅郭炳江公布完公司業績後，一直好有心機抄低記者提問，相反細佬郭炳聯就不斷玩眼鏡，飲水同擔天望地，兩兄弟幾乎全程冇答過問題，大部分由新地老臣子擋駕，直到有記者問佢兩兄弟唔答問題，係咪因為受官司困擾等原因，郭炳江聽罷即反擊，話新地成立咗四十年，根基非常穩固，因為有班好同事同團隊，就算發生咩事，都唔會倒退，仲話佢哋成日一齊開會，投地都係集體決定。
郭炳聯亦都暗示自己冇受到官司影響，依家每日都返工，甚至個個禮拜六都有返工，仲勤力過以前，可能少咗應酬啦，好似話畀大家聽，自從被廉署拘控後，少咗人約佢哋出嚟，盡顯幽默本色，立即惹來哄堂大笑。