政情：李慧琼接棒民記主席？

民建聯喺新界西同香港島直選配票出神入化，分別成功連取三席同兩席，但係喺最重要嘅超級區議會議席選舉，該黨卻配票失敗，令劉江華意外落選，種種傳聞同陰謀論隨即產生。有說係因為劉江華始終並非根正苗紅，又長期容許佢創立嘅地區政團公民力量存在，對建制派配票有影響，到底唔太放心佢接班做主席，於是利用呢個超級機會，令佢不能當上主席。

譚耀宗好想卸任

劉江華尋日接受電台訪問時就直言，民建聯主席一職，應由立法議員出任，既然佢已落選，就一定唔會再爭，反推薦譚耀宗再做多屆，或者由喺超級區會「擊敗」佢嘅Starry接棒。眾所周知年事已高嘅譚耀宗，個人好想卸任主席，Starry接任民建聯新主席嘅呼聲高唱入雲。

至於劉江華無得做黨主席同議員後有乜搞作，據聞個黨想佢專心搞黨務同培育新人，將多年來嘅議政同選舉經驗傳承落去。但亦有人認為佢純粹做黨務係大材小用，指劉江華專長保安同人口政策，好適合做建議中嘅副政務司司長，前提係架構重組落實到先得。

劉入政府有商量

劉江華尋日被問及會否加入政府時，一方面話自己未必適合，但是另一方面亦指要視乎將來情況同考慮各方意見，無閂晒後門。

民建聯黨內亦有人指出，黨主席不宜兼任行會成員，以免政府有醜聞同施政失誤時，整個黨都受拖累，若果Starry真係接任主席，就應該讓番行會個位出嚟，而黨內最適合接任人選，正係早前先將行會席位讓畀Starry嘅劉江華。事實上工聯會喺行會嘅代表鄭耀棠亦非立會議員，咁安排反而令大家做嘢都放啲。

劉江華同Starry除咗可能互換黨主席同行會議席，據聞劉江華亦曾經建議將佢喺新立會大樓個靚景辦事處讓埋畀對方，但係有迷信友嫌劉江華爆冷落選，擔心嗰間房唔多吉利，估計最後會由劉江華嘅愛徒葛珮帆遷入去「凶宅」。