中環出更：施榮懷細時幫手洗尿布
全國政協委員施子清嘅大仔、恒通資源副董事長兼總裁施榮怡（Ivis），尋日獲得浸會大學頒授榮譽院士，與中國富強基金主席李如樑等五人，齊齊現身浸大接受呢份榮耀。一向齊心嘅施家四兄弟與父母總動員去撐場。講起四條化骨龍小時候嘅趣聞，施子清爆料話，細個時老二施榮懷（Irons）最乖巧，事關佢有份幫手湊大老四榮忻，開奶、洗尿布乜都做，認真唔話得。
Irons笑稱，榮忻出世時佢已讀緊中一，當時屋企無請家傭，全靠媽媽一個人照顧四兄弟，好辛苦，所以佢咪幫手做吓家務、湊吓細佬。當年唔興用即棄嘅紙尿片，尿片都用布做。雖然夠晒環保，但係卓妮諗起Irons要洗尿布都覺得好慘，難得佢若無其事，仲好熟行咁教路。
施子清生仔為博女
施子清猛料愈爆愈過癮，話當年隔咗咁耐先至生榮忻，查實係想博生個女喎！雖然最終未能如願，但見到四兄弟咁乖、咁齊心，孫輩加埋都已有十個咁多。人生最樂，莫過於此。