中環出更：張瑋傑生日 兼囝囝百日宴
生完B擺百日宴已經成為潮流，年紀輕輕嘅仁愛堂總理張瑋傑（Ricky）日前就為孻仔啟博（Colin）擺百日宴，「鋼琴公主」孫穎、名媛郭秀雲（Sharon）及仁愛堂一班兄弟姊妹都有嚟湊熱鬧。原來當日仲係Ricky生日，大家齊唱生日歌切蛋糕，氣氛高漲。不過Ricky笑言，細個時好唔鍾意生日，事關佢生日係九月一日開學日，生日要返學，梗係唔開心啦！
Ricky同太太Isabella五年抱三，同大女Tisha、細女Tyra及囝囝Colin一家五口樂也融融，睇見都令人羨慕。產後極速修身嘅Isabella好有心思，親手布置百日宴場地。佢仲準備好生日禮物送畀老公，係一個玩具足球龍門，寓意老公事業「鯉躍龍門」，第時會放喺屋企花園度，等Colin長大後同爸爸一齊踢波。
孫穎內地開班 專教富豪
剛從深圳回港嘅孫穎話，將聯同老師劉詩昆合作，於內地首設「締造非凡」超豪華高級私人會所，親自教授音樂，專門為高收入人士度身訂造「雞精班」，例如喺短時間內練唱一首歌或者彈奏一曲，喺重要節日獻畀至親。孫穎話，唔少富豪只着重物質享受，忽略心靈富足，學習音樂就可以提升個人修養。
Sharon一見Colin即興奮抱起，佢話自己好耐冇抱過BB，畢竟囝囝錢景峰（Andrew）已經係廿二歲嘅大人喇！講起湊B，佢話Andrew細個好乖好定，尤其坐私家車，三秒就瞓着，搞到Sharon擔心佢第時揸車會瞌眼瞓，慶幸Andrew揸車小心，從未出事。
卓妮