功夫茶成日都唔明，親生骨肉嚟o架嘛，點解會有咁多狠心父母做得出遺棄子女呢一個厭惡性動作嘅呢？即使生出嚟嗰個真係一舊叉燒，或者四肢不全五官畸形六神無主，始終都係血濃於水嘅一脈親情，遺棄子女呢家嘢簡直係禽獸不如。
雙非孕婦來港產子嘅問題大家耳熟能詳，有冇諗過原來除咗鵲巢鳩佔搶佔資源之外，雙非孕婦更加會留低唔少爛攤子？即係咁，萬一來港產出一個病嬰或者畸嬰，仲要唔係男嬰而係女嬰，重男輕女嘅國人同胞有機會以奧運冠軍閃電俠保特嘅速度一走了之，任由病到奄奄一息嘅親生骨肉留喺醫院自生自滅。你知啦，狠心父母就話可以埋沒良心速閃啫，醫院方面唔會缺德到將被遺棄嘅病嬰以郵寄方式送交中央政府o架嘛，呢一招大腳傳中相信只有無恥政棍先至做得出。
近年各大公立醫院嘅初生嬰兒深切治療部（NICU）長期爆滿，當中大約三分一係患有先天疾病嘅雙非病嬰，部分已經被父母遺棄，不知幾咁淒涼。同樣淒涼嘅係必須疲於奔命照顧雙非棄嬰嘅姑娘，既要處理病情，又要餵奶換片，身為白衣天使嘅護士無端端變身白衣奶媽，當中嘅苦況真係不足為外人道o架，陰功豬啊陰功豬！
最近之嘛，瑪麗醫院又多咗一個患有先天性心臟病兼且發育不全嘅雙非棄嬰，醫護人員有必要使出渾身解數全天候打點一切。呢一個可憐嘅殘疾女嬰滯留醫院已經超過一個月，若然日後交畀慈善團體都冇人領養都唔知點算好。
所以話啫，前朝政府冇遮冇掩任由雙非孕婦來港產子確係作孽深重，雖然現屆政府已經落閘截龍，唔容許港產媽媽資源繼續被掠奪，之但係後遺症依然尚未徹底消除，唔知仲有幾多手尾要執呀。
講開又講，家陣成個特區政府都幾似一個超巨型棄嬰，過氣特首曾蔭權拍拍屁股走人，仲要即晚去機場遠走高飛然後不知所終，梁朝特首振英哥就要接手餵奶換片湊大一個病到五顏六色嘅低能兒童，簡直忙過粵語殘片裏面嗰個劈柴煮飯打理家頭細務嘅馮寶寶呀！
冇辦法啦，雙非棄嬰固然要照顧，官僚棄嬰亦都要照顧，一班官場怪胎等待被湊大成人。其中一個官場怪胎正正係負責管理公立醫院嘅食衞局，權充奶媽嘅係接替周一嶽做局長嘅高永文。喂，周一嶽時代唔係醫療失誤就係把關不嚴，含毒或含膠嘅黑心食品久不久就攻陷城池，你話唔係官場怪胎咩？
所以咯喎，解決雙非孕婦產完即棄嘅問題之餘，亦有必要解決被遺棄嘅官場怪胎！