政情：幟哥物盡其用撐食翅
近年環保議題愈炒愈熱，唔少飲宴都以燕窩湯羹代替傳統嘅魚翅，以保護海洋生態。曾經喺飲食節目示範炮製魚翅菜式，因而被環保團體批評唔環保嘅飲食界達人黃永幟（幟哥），日前出席一項活動時講起食魚翅，佢就解釋話，其實現時只有四種鯊魚屬於瀕危，而食用可持續性方式嘅魚翅，係物盡其用至真。不過，對於環保團體嚟講，當然另有睇法啦。
幟哥話，外國人喜愛以鯊魚肉入饌，連快餐店嘅魚柳包都係用鯊魚肉製造，剩低嘅魚翅，外國人根本唔識食，將魚翅當做廢物處理，中國人食翅，係人棄我取啫。幟哥又話，佢旗下食肆引入嘅魚翅係來自西班牙、巴西、澳洲、台灣等地，全部都係經過聯合國公約批准，合法輸進本港。