工聯會榮譽會長陳婉嫻成功當選超級區議會議席，但票后寶座就雙手奉送畀民建聯（民記）李慧琼，雖然嫻姐事後勉強擠出笑容，但就好明顯睇到佢心事重重，極之唔開心。之前狠批民記「鎅票」嘅工聯會榮譽會長鄭耀棠尋日就開聲安慰嫻姐，話做唔做到票后並唔重要，因為呢啲虛銜只係過眼雲煙、曇花一現喎；又話工聯會無能力配票，唔承認有過票畀對手。不過，李慧琼由當初民調較低支持度，突然變咗做票后，唔知又點解呢？
