政情：鄧鉅明囝囝部署接班
生意愈做愈風生水起嘅太子珠寶鐘錶，早前贊助舉辦「詩歌瑰麗名錶夜」，展出十二個國際頂級品牌嘅限量版珍藏腕錶及稀世傑作，吸引城中名人到場大開眼界。主席鄧鉅明（Jimmy）、鄧太兼執董鄧宣宏雁（Emily）、執董朱繼陶及太太朱鄧麗萍傾巢而出外，同場仲發現鄧家長子鄧亦軒（Alan）。原來Alan最近榮升董事，象徵太子珠寶第二代終於浮出水面，部署接班。
八十後嘅Alan樣貌好後生，睇落好似大學生，但原來已經大學畢業，仲返公司幫手已有六、七年添，真係睇唔出。風趣嘅Jimmy有子萬事足，笑稱Alan係「太子嘅太子」，勁讚個仔好乖，工作出色，仲話公司仍然係初生嬰兒，大把江山有待囝囝去開創。媽咪Emily亦讚Alan好勤力，多年來由低做起，連前線售貨員嘅工作都試過晒，好幫得手，聽完父母一輪嘴咁讚法，搞到Alan眼紅紅。