政情：梁家騮冧莊三喜臨門
「怪醫」梁家騮成功連任立法會醫學界功能界別議員，正想恭喜佢時，點知原來佢仲喜上加喜，仲係三喜臨門，因為佢太太Cannas今年二月誕下龍仔後，依家又佗緊一對孖女，已經五個月喇，預產期出年一月，趕得切成為小龍女，令到梁家足足有三條龍，真係龍咁威。怪醫話，已經請咗兩個外傭，遲啲再請多兩個陪月，等老婆冇咁辛苦喎。
Cannas就話，冇諗過會生幾多個細路，只係一心諗住自己年紀都唔細，早啲生完就早啲收工，專心湊細路。今次佗孖胎，仲係同卵雙胞胎，即係兩姊妹個樣幾乎一模一樣，但奇在佢兩公婆都冇生孖胎家族史，難怪佢話今次真係意外中嘅意外，遲啲仲要諗吓等對孖女出世後，點樣認出邊個係大孖，邊個係細孖喇。
Cannas仲話，兩個囡囡明年一月出世，唔單止趕及做小龍女，屆時政府仲啱啱好實施「零雙非」措施，唔使同雙非孕婦爭床位，相信產科床位會鬆動啲，喺私家醫院生都舒服啲喎。