政情：阿王搬竇 再做港島人
工聯會大打「風車陣」，成功喺立法會選舉贏多過兩個地區直選議席，當中贏得最傳奇嘅相信係喺香港島搶灘成功嘅王國興（阿王）。草根出身嘅阿王，其實港島先係佢嘅發迹地，多年來喺北角區扎根，做咗十幾年東區區議員及市政局議員，直到○四年擔任立法會勞工界議員，到○八年空降新界西直選並成功當選，今年再透過直選成功重返香港島，十足衣錦榮歸，意義重大，難怪佢話當選後首要任務係要喺香港島搵番個家喇。
阿王擔任東區區議員時，一直住喺北角和富中心，直到○六年、擔任勞工界議員期間，佢就賣咗和富個單位，再買番隔籬另一幢半新嘅樓。○八年佢為工聯會開發新界「大西部」後，為咗方便出入服務新界西選民，佢就將北角個單位放租，喺屯門藍地買咗另一個物業自住，佢當時仲將蘇軾嘅詩句改成「日夜轉車三百趟，不如長做新西人」，以表開拓新西嘅決心。如今佢再搬返港島，都係為咗方便接觸選民，體察民情。
唔怕樓價高 幾貴都搬
至於阿王會搬到港島邊一區，佢就冇詳細交代，但○六年佢賣咗和富中心之後，再以二百八十九萬買入隔籬間半新樓，相信至今升值唔少，究竟佢會收番層樓嚟自住定係再入市買新樓，咁就唔知喇，話唔定佢再住番當年發迹嘅和富中心風水地都未定。不過，阿王話，無論租又好、買又好，佢都心意已決，幾貴都要搬返港島住，仲話自己負擔得起，唔怕樓價高，不過就講明會催逼政府穩定發展樓巿，唔好令大家咁重負擔咁話。
阿王仲話，嚟緊除咗會履行競選承諾外，仲有好大責任要為工聯會擴充版圖，為四年後選舉鋪路。咁又係，阿王去完新界西開荒，成功為工聯會開拓新界區第一個重鎮，依家又成功重返港島插旗，稱得上係開山劈石嘅大功臣，連中兩元咁打得，唔知佢下次會攻去邊區呢？