中環出更：盛情難卻 王嘉恩醉倒內蒙
政圈掀起遊內蒙古熱潮，繼中華廠商聯合會後，身為四川省政協嘅東源大地物流公司老闆王嘉恩（Albert）都首次到訪。遇上當地美女以羊奶酒歡迎，酒量水皮嘅Albert，硬着頭皮乾一碗，即時醉到成晚眼光光。
內蒙人向來好客，奉上羊奶酒係上賓式招待，當地人咁客氣，二十位政協團友當然要輪住飲啦，但輪到Albert時，見佢面有難色。原來佢平時飲啤酒都會醉，但羊奶酒已遞到埋嘴邊，惟有頂硬上乾杯。
點知一杯到肚，Albert即時醉醺醺，好似被人點咗穴咁呆咗，賓客撩佢傾偈都無反應。幸好酒醉都有三分醒，最後識得返房間大覺瞓。
眾團友又到訪海拉爾呼和諾爾草原、滿州里、呼和浩特市，最後參觀埋成吉思汗陵墓，其中喺大草原就發生咗一樁趣事。
大草原誤踩「地雷」
話說當團友見到駿馬喺綠草如茵嘅大草原上飛馳，十足中獎咁興奮，於是狂擺甫士影相，但回頭一看，草原上有一堆啡色嘅物體，原來係乾涸咗嘅動物糞便，Albert看看鞋底不禁暗笑：「果然係大自然！」
卓妮