成日都話香港人多車多，其實計功夫茶話齋，人多車少先至啱。明明通街都係車，有時仲要塞車塞到寸步難移，點解話車少呢？唔係亂噏o架，大家睇下家陣居然出現學童冇車搭嘅怪現象，就會明白何謂人多車少。
好多小朋友返學放學都係搭校巴，而所謂校巴通常即係非專營巴士。你知啦，非專營巴士唔一定接載學童o架，既可以接載私人屋苑住客，亦可以接載南下訪港遊客。如果原本嘅校巴唔再做校巴，改為接載其他客人，咁小朋友就未必有車搭，或者被迫接受一個好得人驚嘅殘酷現實：校巴超載！
未講校巴超載之前，功夫茶同大家講一個荒謬絕倫嘅古仔。有一個姓溫嘅小學五年級男生，家住沙田美田邨，學校係沙田迦密愛禮信小學，除咗搭校巴返學之外就乜都唔識。溫小朋友有日朝早諗住如常上車啦，點知校巴司機話冇位，居然拒載喎，只係畀咗四蚊雞叫佢自己搭巴士。
喂，一個從來未試過獨自搭巴士返學嘅小朋友，撞板多過食飯啦，結果真係搭錯車，一個唔覺意去咗黃大仙天馬苑都唔知自己身在何方。好彩，香港仍然有善心人，一位婆婆見佢迷路迷到茫茫然，不但借出電話畀佢打番屋企求救，更加飾演人肉GPS指點迷津，提供溫小朋友嘅準確位置，早已憂心如焚嘅家人先至能夠派出雷霆救兵，接佢離開人生路不熟嘅險境咋。
司機因乜事幹會拒載嘅呢？首先係家長同校巴公司有矛盾，校巴公司話家長未畀錢留位，家長話校巴公司派錯繳費表格。其次咯喎，當時司機數人頭，發覺假如容許溫小朋友上車就係超載。換言之，校巴座位不足以應付所有人。
好嘞，功夫茶再同大家講一講大圖畫，校巴超載情況愈來愈嚴重，穿梭粉嶺同沙頭角嘅十六座位校巴竟然坐滿二十六名小學生，甚至有保母車違規改裝，僭建出額外座位接載小朋友。業界人士指出，皮費重以及非專營巴士改為接載遊客嘅情況之下，新學年校巴超載將會趨向嚴重。
呢嗱嗱嗱，問你怕未？所以話啫，擴大深圳「一簽多行」來港個人遊之前，特區政府真係要做好配套措施，包括住宿措施以及交通措施，否則唔止學童難受，遊客一樣苦不堪言o架咋。嘗試想像一下，學童被拒載，遊客冇車搭，或者司機但求塞得一個得一個而冒險超載，你話係幾咁危危乎吖！
學童要返學，遊客要旅遊，人多車少如何解決問題呢？麻煩官老爺同運輸業界研究研究，唔好坐以待斃令問題惡化呀！