政情：陳家偉鬼祟復出
尋日立法會選舉嘅採訪、告急通知短訊滿天飛，其中民主黨（白鴿黨）九龍西嘅一個採訪通知短訊，下款聯絡人寫上一個熟悉嘅名字，令好多人見到都打個突話：「唔通係嗰個家偉？」無錯！呢個「家偉」就係去年喺尖沙咀香檳大廈自掏腰包同鳳姐「訪談」，但之後又搞到要辭去白鴿黨總幹事一職嘅陳家偉。
「訪談」主角陳家偉潛咗水一排，選舉先嚟復出，真係勇氣可嘉！但白鴿黨張文光就話今次陳家偉只係幫佢哋安排行程，唔係做前線工作。
陳家偉就話，佢今次只係用義工身份幫吓手，得閒送吓水、送吓貨咁。但當我哋去到採訪現場，諗住同陳家偉訪談吓嘅時候，佢已經唔知走咗去邊。唔怪得佢當日被撞破「訪談」後，可以飛奔落四層樓跑出大廈，追到記者索晒氣囉。