政情：黃家和嘆冇「機」會耕種
樓價狂升，新界農地都值千金。餐飲聯業協會會長黃家和（Simon）喺上水古洞北嘅「慈康農圃」，月前慘被地主收回，六月尾正式結業，佢慨嘆十五年來花逾千萬元配合政府推動有機耕種，到頭來變成一場夢。
Simon日前喺社交網站facebook上載一張重遊農場嘅相片，感慨原本打理得井井有條嘅農田，已長滿雜草。佔地五十萬平方呎嘅「慈康農圃」係Simon嘅心血，經營首五年，年蝕逾百萬元，近幾年先掌握到耕種竅門。但估唔到近年發展商四出收地，優質農地由八年前每呎一百元，升至近年五、六百元，吸引地主們趁高價沽出農地。
聽聞唔少有機耕種戶都面臨迫遷問題，Simon曾就此向特首梁振英（CY）反映，可惜CY都嘆無能為力，但CY嗜好種瓜菜，就算他日遷入禮賓府，都會考慮闢出一角做菜園喎。