政情：陳岳鵬徐英偉瞓身助選
建制派每次選舉嘅成敗，某程度都同當日配票協調工作有莫大關係，少不免要狂打電話拉票。早前返回「娘家」新民黨做義工嘅特首辦前特別助理陳岳鵬（Ronald），就負責留守南區做協調選舉工作，事前已經做足晒準備，一改以前用兩個電話號碼嘅做法，特別買咗兩個電力容量特大嘅流動充電器，唔使驚傾得多電話冇電喎。
選舉最重要係事前嘅布陣，曾經做過南區區議員嘅Ronald話，今次主力留守南區協調各區街站，由於以前都試過參加幾次選舉，所以其實都冇乜唔習慣，加上有機會與舊同事及街坊合作，所以覺得好開心。既然感覺如此良好，會否心郁郁再次參選呢？Ronald就話，做完今次選舉之後先再諗喎。
另外，即將赴內地讀書嘅前民政事務局政治助理徐英偉（Caspar），喺今次選舉都走在最前線，負責協助民建聯超級區議會候選人劉江華喺投票日嘅傳媒聯絡工作，記憶中今次係Caspar初試啼聲做呢方面嘅工作，唔知大家覺得佢表現成點呢？