政情：李慧詩擇偶條件曝光
剛剛喺倫敦奧運攞完銅牌返港嘅李慧詩，尋日接受電台節目訪問時坦言，曾想過放棄做運動員，因為自己係一個鍾意人陪嘅人，但做運動員經常要獨處，加上身邊嘅人唔明白佢，令佢覺得好似得自己一個孤單上路。原來阿詩喺奧運後，擔心被誤會係重名利嘅人，令佢更加想放棄，難怪講到擇偶條件，佢首要對方明白佢，會同佢分析意見嘅人。
對於有傳其教練沈金康或會離任，阿詩話教練冇同佢提及過，但就希望教練可以陪佢出戰下屆奧運摘金，仲話依靠本身信仰增加信心。早在九六年奪得滑浪風帆金牌嘅李麗珊，至今依然受人愛戴，佢喺節目上話，依家出街仍然有市民搵佢合照，以前會令囡囡好反感，埋怨點解媽咪成日被人捉去影相，但自從升小二後已經明白事理。
講到個奧運獎牌，珊珊話放咗喺銀行保險箱，得閒就會去欣賞吓。阿詩就話要等到「風平浪靜」先會攞塊銅牌返屋企，依家暫時放喺宿舍櫃桶存放。