政情：三不密令貪曾冇得投票
尋日立法會選舉投票日，選戰緊湊，但港島半山高主教書院票站，今年再見唔到往年o依起棚牙投票做騷嘅「超貪選民」曾蔭權爵士，點解？咪係因為佢任內爆出連串貪腐醜聞，又喺三月特首選舉期間搞小動作，有關方面早下達「三不」命令，其中一「不」就係要佢喺投票日之前唔准踏足香港，費事又再搞風搞雨。其實貪曾醜聞纏身，仲邊有顏面做港人行使投票權利吖！
已「失蹤」近一個月
貪曾七一執包袱卸任後，旋即同老婆曾鮑笑薇離港外遊，行蹤神秘，七月初有人見到佢哋喺加拿大出現，雖然之後亦曾傳出有人見到佢，但到八月上旬後，已經冇人再見到貪曾，就連天主教堂都再冇貪曾蹤影。但根據過去經驗，貪曾無論幾冇臉見人、幾唔得閒都好，每逢選舉投票日佢都會同老婆去高主教書院票站投票，但尋日投票日就唔見佢哋現身行使公民嘅投票權利。
記得去年十一月區議會選舉，貪曾去高主教書院票站投票時遇到社民連及四五行動成員到場示威，仲嘗試遠距離向佢掟棉花糖，諷刺佢份施政報告嘅派糖措施「輕飄飄」，起初搞到貪曾臉黑黑，但又隨即變臉強裝微笑，向示威者揮手。貪曾一向唔知醜，如果佢有得投票，又點會怕醜唔見人呢？
緊箍咒防節外生枝
查實貪曾係身不由己，有消息話貪曾喺年初特首選舉明撐唐英年，背後係有一股龐大勢力兼涉及龐大利益，而尋日立法會選舉嘅結果係特區政府能否有效施政嘅重大關鍵，為免節外生枝，有關方面故要貪曾喺選舉前禁足香港，連接觸香港官員都唔准，防範佢「搞搞震」影響選舉結果。
「三不」命令仲禁止貪曾撰寫回憶錄或自傳，杜絕佢藉此發揮影響力。由於佢在任期間貪盡海陸空，廉政公署仍在調查當中，如果貪曾違反禁令嘅話，執法機關分分鐘隨時採取行動，貪曾又點敢唔聽話吖，所以「三不」命令就如緊箍咒咁勒緊貪曾，想作反都難呀！