中環出更：童真湯修齊 玩轉荷里活
前博愛醫院主席兼皇后洋行董事總經理湯修齊（Henry），自從今年三月底卸任博愛後，就全情投入工作及陪伴家人。暑假期間，Henry舉家暢遊美國，鍾意扮嘢嘅Henry，喺荷里活買咗超級英雄電影《復仇者聯盟》中嘅角色戲服，同太太Yvonne及一對子女齊着上街遊玩，期間同專業演員扮演嘅蝙蝠俠及小丑等人物狹路相逢，簡直係玩轉荷里活。
全家變身「復仇者」
Yvonne笑稱，外籍人士猛讚Henry係好爸爸，瞓身陪仔女玩，查實係子女陪爸爸玩就真。Henry扮電影中嘅雷神，囝囝Harris同囡囡Athena就扮演美國隊長，太太梗係扮美國隊長之母啦！咁搞鬼嘅戲服，着一次又點過癮呢？所以Henry話，下月萬聖節佢哋將再次變身，到蘭桂坊與市民齊扮嘢狂歡。Henry咁有童真，同家族做玩具生意不無關係，最近佢仲成功取得美國芭比娃娃配飾嘅中國代理權，未來肯定有排忙喇。
卓妮