中環出更：靚太血拼中環
無論天陰或天晴，都無損名人靚太掃貨嘅心情。卓妮早幾日遇到啱啱度假返港嘅大新銀行主席王守業夫人，仲有前民政事務局局長何志平太太胡慧中，佢哋不約而同到中環一帶買靚衫掃貨。卓妮先喺中環皇后大道中H&M對面遇到王守業夫人，當時忽然落大雨，醒目嘅王太即時走入時裝店避雨，咁就「順便」睇吓衫喇，可惜兜咗個圈都冇斬獲，惟有轉移陣地再行過。
王太之前啱啱去咗坐郵輪暢遊克羅地亞等地方，玩咗十幾日至返港。王太話，雖然當地天氣好熱，但因為佢老公一年先至放一次長假，所以有老公陪住已感覺甘之如飴。卓妮跟住又喺ifc商場間Zara見到何太胡慧中，當時佢已經掃完一輪貨等候付款，應該大有斬穫，仲行到口乾飲番啖水抖抖添。買完衫，何太就會合喺門口等佢嘅傭工，然後一齊推住一大車超市物品到地下登上座駕離開，滿載而歸。
鄭詩韻掃兩輪貨
王太同何太啲仔女都已經大晒，但相對青聯賢慧社副主席鄭詩韻（Michelle）嘅一對寶貝仔就只得幾歲，佢要喺家庭、事業與社會工作之間平均分配時間，真係唔容易。好彩Michelle有個好老公幫手湊仔，但購買囝囝嘅日用品，佢絕對唔會假手於人，有日就見佢抽住三大袋嬰兒用品喺雲咸街等車接載，見司機一到，佢即刻好肉緊指手畫腳吩咐司機將三袋用品擺放好，先至安心再去時裝店再掃貨。
卓妮