「僭建物留喺度愈耐，就會愈危險，屋宇署係咪要等到出咗事先處理？」居於佐敦的吳小姐多年前曾向屋宇署舉報，指上海街有大廈天台僭建鐵皮屋，惟近月發現僭建物仍然存在，不但鐵皮生銹，窗戶更搖搖欲墜，擔心遇上大風雨隨時會有墜落之虞，危害途人安危。
屋宇署發言人承認，○七年已接獲有關僭建物的舉報，並根據《建築物條例》向業主發出「警告通知」，並送交土地註冊處註冊（俗稱「釘契」）。發言人續稱，最近再度派員視察，發現僭建物仍然存在，已向業主發出法定命令，着其盡快自行安排清拆。
油尖旺區議員陳偉強批評，屋宇署低估僭建物的危險性，擔心遇上颱風會構成人命傷亡，要求當局嚴加正視區內僭建問題，「屋宇署覺得好多僭建物都冇即時危險，啲業主咪拖住唔拆囉，但呢幾年啲颱風咁強，天台啲僭建物分分鐘會吹落嚟！」