今日先講個古仔。話說從前有個大財主請客，觥籌交錯之間突然骾親，咳唔出又抖唔到氣，情勢危急。好彩經過一輪掙扎，大財主終於將卡住喉嚨嘅食物吐咗出嚟，死過翻生嘅佢急急趕走班賓客，仲大聲咁話：「食飯會骾死人，大家以後都係唔好食飯嘞！」
大家聽完古仔，係咪覺得呢個財主佬係大傻瓜呢？無錯，呢個就係成語因噎廢食嘅典故。功夫茶今日之所以同大家重溫呢個古仔，原因好簡單，香港亦有唔少因噎廢食嘅傻瓜。
呢，先睇一單新聞。特首梁振英繼日前表示暫停放寬個人遊三星期之後，尋日又宣布無限期擱置「一簽多行」訪港措施，直至確定香港有足夠接待能力，先至再作考慮。至於一簽一行或一簽兩行，就會繼續推行，但需有秩序審批。
嗱嗱嗱，你話香港人係唔係嫌錢腥吖？個人遊一直係支撐本港旅遊業嘅中流砥柱，放寬個人遊即係擴闊財源路，家陣一句旅客太多，就急急煞停，咁同趕走財神爺有乜分別？又同因噎廢食有乜分別？
無錯，針無兩頭利，旅客過多，難免為香港社會帶來各種壓力，有人甚至擔心逼爆香港添，呢個係事實，但歸根究柢都係因為前朝政府胡混度日，冇諗辦法增加旅遊配套及設施，搞到旅遊業承受能力不足，解困之道應該係設法諗計擴大容量，而唔係關門趕客囉。須知道，現時環球經濟陰霾滿布，全世界都絞盡腦汁吸納內地豪客賺人仔，香港卻反其道而行，將財神爺拒諸門外，唔通真係嫌錢腥？香港不思進取，閉關自守，仲講乜嘢旅遊之都、國際都會呀！
唉，無計啦，承諾「穩中求變」嘅梁振英政府上場後，受到利益集團同反對陣營嘅明槍暗箭，施政動輒得咎，無日安寧，莫講話無辦法集中精力發展經濟及民生，就算喺學校推出前朝政府拍板嘅國民教育，都搞到滿城風雨，唔係罷課，就係絕食，喺咁嘅情況之下，新政府要求內地擱置一簽多行，平息爭議，都算係無選擇中嘅選擇咯。
講到呢度，功夫茶只係想提醒香港人一句，因噎廢食嘅古仔仲有續集o架，就係財主佬執迷不悟，結果白白餓死。香港如果唔想步財主佬後塵，就要檢討吓自己，喺旅遊基礎設施上面急起直追，口岸基建係咪充足呀？賓館房間又係咪足夠呀？如果矇查查，唔該重溫本報日前嘅獨家報道，由足浴店暗中化身嘅足浴賓館已經開到成行成市，香港接待旅客嘅能力有幾大改善空間，畫公仔唔使畫出腸啦。
一句講晒，一簽多行行人止步，但香港嘅旅遊擴容工程就唔可以停步，快快改善，開門迎客，咁先至係正路吖嘛。試諗吓，如果內地「閂水喉」，完全叫停個人遊，香港又點算呢？