政情：盡燒返工衫 黃靜文堅退休
特首梁振英新班子上任只有兩個多月，但經歷嘅難關一浪接一浪，呢個熱廚房真係唔係個個都頂得住。就好似前政制及內地事務局副局長黃靜文，佢一向都係公認嘅醒目女，所以當新一屆政府需要人才時，唔少政界人士都會即刻諗起佢，不過黃靜文聲稱已經燒晒啲衫，堅決退休。
近日，聽聞有唔少政界人士好掛住呢位又叻、又醒目嘅黃靜文，但佢非常堅決要退休，過自由自在嘅生活，佢仲同朋友講，話已經將以往做副局長時候嘅返工靚衫全部燒晒，靚袋亦已捐晒出去。不過，其實黃靜文今年只係四十七歲，同現任政制及內地事務局局長譚志源同年齡，尚算年輕活力無限，所以有人就話女人嘅嘢，衫燒晒可以再買過。買過晒啲新衫，咪當換季囉。