明日係立法會選舉投票日，到底一班建制派候選人最終能否協調成功，避免互拉後腿拖累選情，還看班支持者識唔識自行配票，放棄某啲機會麻麻嘅候選人。尋日建制派流傳一首用候選人名稱創作嘅打油詩，有人打趣話，唔通呢個係建制派嘅力保名單？
呢首打油詩係咁嘅：「九月九日早起床，齊齊投票撐香港。東九起動超人俊，西九繽紛美芬香。新東航海確珮帆，新西回航心志祥。港島安定國興旺，超級保護海瓊皇。我等親朋齊參與，香港繁榮享安康！」寥寥幾十字，已經暗示出建制派各區嘅重要候選人名字，認真犀利。
建制派票源分配唔勻，令到唔少原本以為鐵定當選嘅候選人變得危危乎，呢首打油詩正正準確無誤咁道出各區出局邊緣建制派候選人嘅姓名同處境，明眼人相信一睇就知講緊邊個。由於呢首詩近日不斷喺建制派圈中流傳，有政界中人就謔稱，呢個或許就係要保證當選嘅名單都唔定喎。